إشحلات إعيونك

لا تگلب كلامي و دقق إبمعناي

أسمعك غزل حار و رايد إبشارة

حلات العشگ من نتلاگه عين إبعين

و نطگ إصبع و نرگص و إحنه خطّاره

بعد نركب سفينة و نرفع الهه إشراع

و إنطوف المضىء و نتسمّى بحّاره

نهلهل من گلب و لسان عيد و جاي

و نصيد السمك بإلشص تشتعل ناره

إشحلو وسط البحر و السمك مشوي إوگوف

و يهب عطر الشوي و ايبخّر إبداره

إگباله خبز سيّاح و شمر رصّاع

طابگ مختمر و ايعطّر إحواره

و أنا ويّاك بثياب السفر حفّاي

إبزي العشگ نضحك نكشف أسراره

أسمعك من تغنّيلي هچع بطوار

و أدگ چوبي أبكلامك و الفت أنظاره

أعتقد حفلت فرحنه إنتهت و الخطّار

جالس ينتظر تتقدّم أنصاره

حط ايدك بدي خل نخلق إعجوبات

خل نرمز عشگنه و تشتعل ناره

خل إنذوب بل حب خل ندگ ونّات

خل نشتل ورد خل نسگي بحجاره

أحس بيك أنت روحي و گلبي يا مدلول

إشحلات إعيونك إتصد تحرگ ايزاره

أويلي إشگد أحبّك صرت كل مجنون

أحس نارك تشب بعيوني جرّاره

أنت إمنين إجيت و دمّرتني إوياك

عساها إبّخت كلمن ذبني و تباره

جاسم محمد الحسّاني 06/01/2025